सौ.वनिता संभाजी जांगळे
कवितेचा उत्सव
☆ नववर्षाच्या स्वागताला… ☆ सौ. वनिता संभाजी जांगळे ☆
☆
उभारून उंच गुढी अंगणी
नाविण्याची आरास झाली
आंब्याचे तोरण चौकटीला
नववर्षाच्या स्वागताला
*
पानगळीचा शिशिर गेला
देठ कोवळा चैतपालविला
रानोमाळी गुलमोहर फुलला
नववर्षाच्या स्वागताला
*
नववर्षाच्या सुवर्ण पहाटेला
सोनकिरणांची होते उधळण
नवा संकल्प मनी धरीला
नववर्षाच्या स्वागताला
*
मान कळकाच्या काठीला
शौर्य आणि विजयी ध्वजाचा
नवचैतन्याचा साज गुढीला
नववर्षाच्या स्वागताला
*
जपूनी आपली परंपरा
गुढीपाडवा करू साजरा
नाविण्याचा साज आयुष्याला
नववर्षाच्या स्वागताला
☆
© सौ.वनिता संभाजी जांगळे
जांभुळवाडी-पेठ, ता. – वाळवा, जिल्हा – सांगली
संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
