श्री तुकाराम दादा पाटील
कवितेचा उत्सव
☆ चेहरा… ☆ प्रा तुकाराम दादा पाटील ☆
☆
ओळखीला ओळखीने दाद देतो चेहरा
मौन होते बोलके मग हासतो तो चेहरा
*
जोडली जाते नव्याने जागृतीची साखळी
विसरलेल्या आठवांचे गीत गातो चेहरा
*
मागचा इतिहास सारा जाणिवांचा जागतो
आवडीने निवडलेला याद येतो चेहरा
*
वेगळा संवाद होतो थांबलेला बोलका
वेदना संवेदनानी शांत होतो चेहरा
*
अंतरंगी माजते काहूर जेव्हा वेगळे
वादळी वा-यात तेव्हा दूर जातो चेहरा
*
लाघवी संवाद होतो संयमाने बोलतो
देखणा नसला तरीही भाव खातो चेहरा
*
जाणत्याना भेटताना संगतीने खेळतो
भावनांच्या वेगळ्या सौख्यात न्हातो चेहरा
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
