कविराज विजय यशवंत सातपुते
कवितेचा उत्सव # 225 – विजय साहित्य
☆ प्रतिभेचे चैत्रांगण…! ☆ कविराज विजय यशवंत सातपुते ☆
☆
गंध बकुळीचा आहे
अलौकिक साहित्याला
शांता शेळके शैलीने
दिला अर्थ लालित्याला..! १
*
इंदापूर जन्म गाव
खेड मंचर आजोळ
बालपण गेले येथे
शब्दांकीत झाली ओळ.! २
*
लोक संस्कृतीचा ध्यास
लोक साहित्याचा पाया
शब्दां शब्दांवर त्यांच्या
केली शारदेने माया.! ३
*
जन जीवन ग्रामीण
साधं सरळ दर्शन
कारूण्यानं भरलेल्या
साहित्याचं आकर्षण.! ४
*
भाषाभ्यास मराठीचा
जोड इंग्रजी संस्कृत
लेखनाच्या व्यासंगाने
काव्य गीत आलंकृत.! ५
*
लोकप्रिय गीतकार
भावनाट्य शब्दांकन
भाव भावना नाजूक
हळवेले संवेदन.! ६
*
असा बेभान हा वारा
पाण्या वरच्या पाकळ्या
मेघदूत अनुवाद
उमलल्या शब्द कळ्या.! ७
*
धूळ पाटी आत्मकथा
प्रतिभेची दैवी रेघ
कथा कादंबरी गीत
शब्द सौंदर्याचे मेघ…! ८
*
सूक्ष्म तरल भावना
भाषा शैली ओघवती
शुद्ध, निरागस काव्य
गीत शैली खळाळती..! ९
*
देहभान विसरून
निसर्गात रममाण
उत्कटसा आविष्कार
शब्द लालित्य प्रमाण.! १०
*
कधी कळ्यांचे दिवस
कधी फुलांच्याच राती
आनंदाचे झाड असे
आठवांच्या फुलवाती..! ११
*
गीते सुनीते लावणी
कथा लेखन विपुल
बालकथा बालगीते
घालतात रानभूल..! १२
*
आत्मपर लेखनाची
शांताबाई एक यात्री
नाट्य गीते, भक्ती गीते
कोळी गीते नेक गात्री..! १३
*
बहु आयामी लेखिका
साहित्याचे मानांकन
अभिजात दैवी लेणे
प्रतिभेचे चैत्रांगण…! १४
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
