सौ. उज्वला सुहास सहस्रबुद्धे
☆ माझा आधार -वड… ☆ सुश्री उज्वला सुहास सहस्रबुद्धे ☆
☆
सोडून गेला तुम्ही अकाली,
या जन्मीची गाठच सुटली !
राहिले मी इथेच आता,
तुझ्या विना का जगी एकली!….१
*
बांधू न शकले तुझं हाताला,
कमी पडला सावित्रीचा धागा !
मजवरी पडला अवचित घाला,
तुम्हांस मिळाली स्वर्गी जागा !…२
*
सावित्री होती पुण्यवान मोठी,
तप केले तिने भ्रतारासाठी !
यमास केले प्रसन्न तिने,
ओढून आणी सौभाग्य हाती!….३
*
इतकी पुण्याई नव्हती माझी,
तुझ्या सवे जाण्याची वरती !
तरीही पूजिते वटवृक्षाला,
पुढील जन्मी दे हाच साथी!…४
*
होतास तू माझा आधारवड !
आदर, भक्ती, प्रीती तुजवर !
जिरवते मी मनातले कढ,
दुःखी होई जरी माझे अंतर !…५
*
मन होते जरी अस्वस्थ माझे,
घडणारे ते घडून जाते !
सांत्वन करते मीच मनाचे,
रामाची इच्छा म्हणून राहते !….६
☆
© सुश्री उज्वला सुहास सहस्रबुद्धे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
