मराठी साहित्य – कवितेचा उत्सव ☆ विजय साहित्य # 227 ☆ त्याची कविता… ☆ कविराज विजय यशवंत सातपुते ☆

कविराज विजय यशवंत सातपुते

कवितेचा उत्सव # 227 – विजय साहित्य

☆ त्याची कविता… ☆ कविराज विजय यशवंत सातपुते  ☆

(मात्रा वृत्त..अनलज्वाला)

☆

नाविन्याची, कल्पक मात्रा , त्याची कविता.

चराचराची, मंगल यात्रा

त्याची कविता. १

सुखदुःखाची, करी साठवण,

पद्य तालिका.

शाब्दिक चित्रे,घडवी पात्रा,

त्याची कविता. २

भावमनाची, खळाळ खळखळ

संजीवन ते.

विद्रोहाची,सचैल धारा,

त्याची कविता. ३

मना मनाला, वाचत जाते, टिपून घेते.

लेक लाघवी, लळा लावते,‌

त्याची कविता. ४

अनुभूतीने, अनुभवलेली,

रसाळ बोली.

काळजातला, अत्तर फाया

त्याची कविता. ५

कशी नसावी,कशी असावी

ठरे दाखला .

पहा वाचुनी, साधी सोपी,

त्याची कविता. ६

गंध मातीचा,रंग मानसी

काजळ कांती.

थेंब टपोरा, शब्द घनांचा

त्याची कविता. ७

कधी माय ती,कधी बाप ती

कधी लेक ती.

नात्यांमधली,नाळ जोडते,

त्याची कविता. ८

पोषण करते, लालन पालन,

घडवी त्याला.

घास भुकेचा, ध्यास मिठीचा,

त्याची कविता. ९

टाळी देते, टाळी घेते, सभा गाजवी .

प्रतिभा वाणी,अक्षर राणी

त्याची कविता. १०

भाव सरीता, रसिक मनाची,

गूज सांगते.

कविराज तो, वही बोलकी,

त्याची कविता. ११

☆

© कविराज विजय यशवंत सातपुते

सहकारनगर नंबर दोन, दशभुजा गणपती रोड, पुणे.  411 009.

Print