श्री तुकाराम दादा पाटील
कवितेचा उत्सव
☆ कविता… ☆ प्रा तुकाराम दादा पाटील ☆
☆
लेऊन शब्द सुमने सजते मनात कविता
होऊन लाडकी मग रमते जनात कविता
*
रंगात रंगताना असली आनंद देते
प्रत्येक माणसाच्या वसते मुखात कविता
*
फुलपाखरी मनाची आहे आनंद वेडी
वारा बनून जाते हिरव्या पिकात कविता
*
सुखदुःख भोवतीचे पदरात तीच घेते
घेऊन वास्तवाला फिरते जगात कविता
*
प्रेमात प्रेमिकांच्या न्हाऊन धुंद होते
तारूण्य भोगताना येते भरात कविता
*
चपला नभातलीही वसते मनात माझ्या
झालीच देव आहे माझ्या घरात कविता
*
जातीत आपला का झुलतो समाज आहे
माणूसकी जपाया झटते नितांत कविता
*
आहेत आंधळे जे झाले गुलाम येथे
भरवील आज त्यांच्या धडकी उरात कविता
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
