सौ.उज्वला सुहास सहस्त्रबुद्धे
कवितेचा उत्सव
☆ ओढाळ मन… ☆ सौ.उज्वला सुहास सहस्त्रबुद्धे ☆
☆
मन आभाळ आभाळ,
कधी सान, कधी विशाल!
कधी पाण्याचा डोह,
कधी सागर नितळ!
*
कधी असे ते पाखरू,
तेजापाशी झेपावलेले
कधी असे ते निश्चल,
कूर्मापरी स्थिरावलेले!
*
कधी अतीच चपळ,
निमिषातच दूर धावे!
कधी असते निश्चल,
वज्रासारखे एक जागे!
*
मना तुझा ठाव,
घेता येईना जीवाला!
फिरते मीही तुझ्या संगे,
गिरकी सोसेना ती मला!
☆
© सौ. उज्वला सुहास सहस्रबुद्धे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
