मराठी साहित्य – कवितेचा उत्सव ☆ “ती सध्या काय करते?” ☆ श्री आशिष मुळे ☆

☆ “ती सध्या काय करते?” ☆ श्री आशिष मुळे ☆

☆

ऐक पोरा बोल अनुभवाचे

ऐकायला काहीच खर्च नाही

‘ ती सध्या काय करते ‘

याला काही अर्थ नाही 

*

चिडू नकोस रडू नकोस

त्याचे तिला काहीच नाही

परी हृदयावर हसऱ्या

तिची तलवार…. चालत नाही

*

खरंच होते का नव्हते

याने शिलकीत भर नाही

काय होते किती होते

हिशोबात या…. ‘अर्थ‘ नाही

*

तिच्यासाठी झुरण्यापेक्षा

मर्द बनण्यात नुकसान नाही

असेल गरज तर येईलही

नाही आली तरी….. हरकत नाही

*

हो अभेद्य उत्तुंग इतका

चोर वाटांची गरज नाही

उधळू दे अश्व आत्मज्ञानाचा

अश्वमेधाला…. मुहूर्त नाही

☆

© श्री आशिष मुळे