मराठी साहित्य – कवितेचा उत्सव ☆ कृष्ण आहे… ☆ सौ. ज्योती कुळकर्णी  ☆

सौ. ज्योती कुळकर्णी 

अल्प परिचय : 

मराठीत वाङ्मय पारंगत आहे.

काही काळ कारंजा व अकोला येथे वरिष्ठ महाविद्यालयात कंत्राटी प्राध्यापिका म्हणून कार्यरत.

 कवितेचा उत्सव 

☆ कृष्ण आहे… ☆ सौ. ज्योती कुळकर्णी ☆

(वृत्त: आनंदकंद) 

☆

स्वप्नात भासले मज दारात कृष्ण आहे

मी जागता कळाले विश्वात कृष्ण आहे

*

राधा सखी कितीदा मुरलीधरास शोधे

जाणीव होत गेली हृदयात कृष्ण आहे

*

वाटेत चालताना वाटाच बंद झाल्या

दिसतील मार्ग नक्की स्मरणात कृष्ण आहे

*

कृष्णास शोधते पण दगडात देव नाही 

साधेच नाम घेता ओठात कृष्ण आहे

*

युद्धास तोंड देते पळण्यात शौर्य नाही

साथीस आज माझ्या समरात कृष्ण आहे 

☆

© सौ. ज्योती कुळकर्णी

अकोला

मोबा. नं. ९८२२१०९६२४

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈