श्री दयानंद घोटकर
कवितेचा उत्सव
☆ विश्वनायक… ☆ श्री दयानंद घोटकर☆
☆
हे सुमुखा, हे विनायका
विश्वाधिपती, नमो नमः ।।
*
सर्वारंभी, तुझेच पूजन
अग्रभागी, तू देवलोकी
चराचरी तू, अणुरेणुतून
ज्ञान विज्ञानी, तिन्ही लोकी…
*
रक्तवर्णी, जास्वंद पुष्प अन्
दुर्वा, बेल, शमी, प्रिय तुला
शक्ती, भक्ती, अन् संयमाचा
वरदनायक, ऋद्धी सिद्धीचा..
*
स्थूल सूक्ष्म तू, सगुण-निर्गुण
पाशांकुश, धारक योद्धा
सकल कलांचा, तू निर्माता
प्रणवरुपी, शुभ-लाभ पिता…
*
वेद व्यासमुनी, तुज विनविती
महाकाव्याच्या, लेखना
तूच देसी, प्रतिभा-प्रतिमा
साहित्याची, तूच प्रेरणा…
*
नृत्य-नाट्य, रंग-वेष, अभिनय
निर्मिसी, जगती, श्रेष्ठ कला
सूर-ताल, सूर्य-चंद्रासम दिधले
चित्र-शिल्प, दिले या जगताला…
*
आनंद देसी, शांती देसी
मांगल्य देसी, सकल जीवा
कलावंत तू, विद्याविभूषित
वंदनीय, सा-या विश्वा…
☆
© श्री दयानंद घोटकर (प्रेमकवी)
संपर्क – तावरे काॅलनी.सातारा रोड.पुणे
मो 9822207068
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
