सौ.रेणुका धनंजय मार्डीकर
कवितेचा उत्सव
☆ मोरपंखी साज ल्याला माझा गणराज ☆ सौ.रेणुका धनंजय मार्डीकर ☆
☆
मोरपंखी साज ल्याला माझा गणराज
आरतीचा मंजुळ स्वर निनादतो आज॥धृ. ॥
*
तुंदिल तनु गोंडस ती मुर्ती साजिरी
नेत्र कमल प्रेममयी दिसती गोजिरी
सुखकर्ता दुःखहर्ता माझा गणराज
आरतीचा मंजुळ स्वर निनादतो आज
*
मखराची शोभा ती श्वेतवर्णी साजरी
माउलीचे प्रेम देई मुर्ती किती हासरी
पुष्पहार दुर्वांकुर मौक्तिक माला साज
आरतीचा मंजुळ स्वर निनादतो आज
*
सुंदरते रूप मना मोहविते असे
मोरपंख नाजूकसे भोवती शोभतसे
थड थड थड ताशाचा वाजतसे गाज
आरतीचा मंजुळ स्वर निनादतो आज
*
मंगलमूर्ती आले विघ्न हराया
मनामध्ये अवघा आनंद भराया
पार्वतीच्या नंदना स्वागत गणराज
आरतीचा मंजुळ स्वर निनादतो आज
☆
© सौ.रेणुका धनंजय मार्डीकर
औसा.
मोबा. नं. ८८५५९१७९१८
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
