श्री सुहास सोहोनी
कवितेचा उत्सव
☆ जीवन व्हावे कोकीळ गाणे… ☆ श्री सुहास सोहोनी ☆
☆
साधी सुंदर सोपी वाट
ताशिव पाषाणाचा घाट
एका बाजुस सुमने पुष्पे
दुजा बाजुला निर्मल पाट…
*
यात्रिक पाथिक आणिक बहुजन
भले बुरे नेण्यासी वाहुन
स्थितप्रज्ञशा सजग पायऱ्या
सिद्ध नाम करिती सोपान…
*
तांबूस पिवळी पहाट यावी
चाहुल हलकी कानी पडावी
पदचिन्हे तव भाग्य घेउनी
नकळत वाटेवर उमटावी…
*
सायंकाळी बाळ प्रदोषा
घेऊन येई मंगल आशा
पुण्यदायिनी दोषनाशिनी
वाट अंगणी येवो ईशा…
*
पवित्र मंगल वाटेवरुनी
सदैव व्हावे येणे जाणे
आनंदाचा घन बरसावा
जीवन व्हावे कोकिळ गाणे…
☘️
© सुहास सोहोनी
रत्नागिरी
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर
