श्री सुहास सोहोनी
कवितेचा उत्सव
☆ 👁️ डोळे… 👁️ ☆ श्री सुहास सोहोनी ☆
☆
एक सूख आनंदाने
डोळ्यांमधून हसू लागलं
एक काहूर अश्रू होऊन
डोळ्यांमधून वाहू लागलं
*
तृप्तीचा एक भाव
डोळ्यांवाटे मनांत जिरला
मनांवरचा एक घाव
डोळ्यांमधून गळून पडला…
*
राग लोभ द्वेष प्रेम
सारा भाव डोळ्यांत दिसतो
अंतर्बाह्य माणूस दिसे
डोळा एक आरसा असतो…
*
उघडे डोळे झाकले डोळे
विस्मयाने फाकले डोळे
विस्फारलेले ताठ डोळे
घाबरलेले बंद डोळे…
*
शांत डोळे क्लांत डोळे
दर्शन घेण्या उत्सुक डोळे
आतूर डोळे चतूर डोळे
परदु:खाने थिजले डोळे —
*
डोळे नसती कधीच पापी
नजर वाकडी असते
भला बुरा तर माणुस असतो
नाठी बुद्धी चळते —
*
काळ्या काळोखास बघावे
की तेजाने दिपून जावे
भव्य बघावे, दिव्य दिसावे
दृष्टीत सृष्टीला ओढावे —
☘️
© सुहास सोहोनी
रत्नागिरी
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर
