मराठी साहित्य – कवितेचा उत्सव ☆ श्री अशोक भांबुरे जी यांची कविता अभिव्यक्ती #258 ☆ चांदण झूला… ☆ श्री अशोक श्रीपाद भांबुरे ☆

श्री अशोक श्रीपाद भांबुरे

अशोक भांबुरे जी यांची कविता अभिव्यक्ती # 258

☆ चांदण झूला… ☆ श्री अशोक श्रीपाद भांबुरे ☆

☆

 किती येउदे दुःखे त्यांना शिंगावरती घेऊ

बुडणाराला उडी मारुनी काठावरती घेऊ

*

मी नेत्याचा दास कोडगा कायम श्रद्धा त्यावर

घोटाळेही केले त्याने अंगावरती घेऊ

*

दोघामधला सूर ताल जर कधी बिघडुनी गेला

समजुतीने पुनःश्च त्याला तालावरती घेऊ

*

सुगंध मोहक या देहाला वेड लावतो आहे

प्रेमापोटी गुलाबास त्या ओठांवरती घेऊ

*

होय शिवाचे शूर मावळे तलवारीशी खेळू

नात्यामधल्या गद्दाराला भाल्यावरती घेऊ

*

तुकडे तुकडे करणारे हे नकोत नेते आम्हा

देशासाठी झटेल त्याला डोक्यावरती घेऊ

*

चल वस्तीला जाऊ तेथे असेल चांदण झूला

एक देखणा असा बंगला चंद्रावरती घेऊ

 ☆

© श्री अशोक श्रीपाद भांबुरे