श्री तुकाराम दादा पाटील
कवितेचा उत्सव
☆ बातमी… ☆ प्रा तुकाराम दादा पाटील ☆
☆
हरवली आहेच संधी लाभ होण्यासारखी
बातमी कळली मनाला झोप उडण्यासारखी
*
सोसतो वनवास आहे भोगताना यातना
वेळ नाही ही सुखाने श्वास घेण्यासारखी
*
वास्तवाने मांडलेला खेळ आहे घातकी
हाक येते रोज कानी जीव जाण्यासारखी
*
काळजाला काळजाची ओढ नाही राहिली
राहिली नाही स्थिती ही गीत गाण्यासारखी
*
संपला आदर्श आहे स्वार्थ झाला आंधळा
माणसे झालीत आता क्रूर प्राण्यासारखी
*
भोगवादी जीव झाले चैन आहे चालली
शासनाची धोरणे ही आज वाण्यासारखी
*
चालला आहे तमाशा रोज येथे वेगळा
लावणी घोळून होते दाद देण्यासारखी
*
प्रेमबंधाची कहाणी रोज करते मागणी
नेमकी ठरते वसूली लाच खाण्यासारखी
*
चेतना संपून गेल्या देह धोंडा जाहला
भावना गोठून गेली गार पाण्यासारखी
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
