श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # 261
☆ पुरावा… ☆ श्री अशोक श्रीपाद भांबुरे ☆
☆
त्याच्या समोर त्याचा जाळला पुरावा
खोटाच त्या ठिकाणी जोडला पुरावा
*
डोळ्यामधील धारा सत्य बोलल्या पण
न्यायास मान्य नाही वाटला पुरावा
*
साक्षी फितूर झाले स्वार्थ जागल्यावर
घेऊन चार पैसे बाटला पुरावा
*
हाती धरून त्याने भ्रष्ट यंत्रणेला
फाईल चाळली अन चोरला पुरावा
*
ह्या न्यायदेवतेने बांधलीय पट्टी
डोळ्यामधेच आहे गोठला पुरावा
*
न्यायालयातसुद्धा हे असे घडावे
पैशासमोर होता वाकला पुरावा
*
भोगून सर्व शिक्षा संपल्याबरोबर
निर्दोष तूच आहे बोलला पुरावा
☆
© श्री अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
