सौ. उज्वला सुहास सहस्रबुद्धे
☆ गीता जन्म दिन… ☆ सुश्री उज्वला सुहास सहस्रबुद्धे ☆
(गीता जयंती विशेष -11 दिसंबर 2024)
☆
जन्म झाला गीतेचा,
कुरुक्षेत्री युद्ध स्थळी !
कृष्ण अर्जुनाचे नाते,
उमगले ते त्यावेळी !
*
अर्जुन झाला हतबल,
कृष्णास ते पाहवेना!
उपदेश पार्थास देता,
मधुसूदनास राहवेना !
*
जन्म दोहोंचे जाहले,
विशिष्ट अशा हेतूने !
महाभारत ते घडले,
परब्रम्हाच्या साक्षीने!
*
बालपण तुझे कृष्णा,
गोकुळी खेळात रंगले!
गोकुळ सोडूनी जाता ,
कर्तव्यास तू वाहून घेतले!
*
द्रौपदी होती मनस्विनी,
तशीच ती स्वाभिमानी!
नकळत तिच्या कृत्याने,
झाली युध्दास कारणी !
*
कोणास जाणीव होती,
भविष्यात काय घडेल?
असहाय होता हे जाणून,
घडणारे कधी न चुकेल !
*
गीता धर्म सांगताना ,
अठरा अध्याय वदले!
ज्ञानामृत ते देताना ,
मागे काही न राखले !
*
गीता निरंतर मार्गदर्शक ,
पठण करू या गीतेचे !
सर्वांसाठी लाभदायक,
सार्थक होईल जन्माचे !
☆
© सुश्री उज्वला सुहास सहस्रबुद्धे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
