श्री सुजित कदम
कवितेचा उत्सव
☆ काय हवय…? ☆ श्री सुजित कदम ☆
☆
त्या दिवशी मंदीरातून
देवाच दर्शन घेऊन मी बाहेर पडलो
तेवढ्यात…
मळकटलेल्या कपड्यांबरोबर
लेकराचा मळकटलेला हात
समोर आला…!
मी म्हंटलं काय हवंय..?
त्यांनं…
पसरलेला हात मागे घेतला आणि
क्षणात उत्तर दिलं … आई…!
मी काहीच न बोलता
खिशातलं नाणं त्याच्या मळकटलेल्या
हातावर ठेऊन निघून आलो…
पण.. तो मात्र
वाट पहात बसला असेल…
मळकटलेला हात पसरल्यावर
त्यानं असंख्य जणांना दिलेल्या
उत्तराच्या उत्तराची…!
© श्री सुजित कदम
मो .. 7276282626
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
