मराठी साहित्य – कवितेचा उत्सव ☆ कॅनवास… ☆ श्री हरिश्चंद्र कोठावदे ☆

श्री हरिश्चंद्र कोठावदे

 कवितेचा उत्सव 

☆ कॅनवास… ☆ श्री हरिश्चंद्र कोठावदे ☆

(वनहरिणी)

☆

मान्य की माझ्या ह्या जन्मीचा, कॅनवास हा अफाट नव्हता

सटवाईने लिहिला भाळी,विधीलेखही अगम्य नव्हता

*

तशी फारशी नव्हती वळणे,वाट बिकट वा नव्हती खडतर

भरकटणे वा चुकणेबिकणे,वहिवाटेला नव्हते मंजुर

*

जन्मजात पण रक्तामधला,होवु लागला मुंज्या जागा

हळूहळू मग चाकोरीला,ग्रासु लागली पिशाच्चबाधा

*

दावे तोडुन एक वासरू,कळपामधुनी गहाळ झाले

बेछूट आणि उदंड होवुन, झपाटलेल्या रानी आले

*

तसाच झालो बंधमुक्त मी,हद्दीमधुनी हद्दपारही

मोडुन तोडुन सर्व नकाशे,जरा जाहलो विश्वंभरही

*

अरुणप्रभेचे सूर्यास्ताचे,चढणीचे अन् उतरंडीचे

क्षणांत साऱ्या रंग मी भरले,काळजातल्या इंद्रधनूचे

*

रंगत गेला रंगसोहळा, कॅनवासही विराट झाला

मुळे पोचली अथांगात अन् शेंडा माझा गगनी भिडला !

☆

© श्री हरिश्चंद्र कोठावदे

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈