श्री तुकाराम दादा पाटील
कवितेचा उत्सव
☆ बनाव… ☆ प्रा तुकाराम दादा पाटील ☆
(जलौगवेगा)
☆
भलेपणाचा प्रभाव आहे
तसाच येथे दबाव आहे
*
नवीन संधी लुटायची तर
तसाच केला सराव आहे
*
उगीच त्रागा करू नका ना
अशांत झाला जमाव आहे
*
विरोधकांच्या पराभवाचा
जमून केला ठराव आहे
*
दबून थोडे जपून वागा
बघून जेथे तणाव आहे
*
मिळेल ते तो नमून घेतो
मलूल ज्याचा स्वभाव आहे
*
सुखात नाही कुणीच येथे
सुधारणांचा अभाव आहे
*
फसाल तेव्हा कळेल सारे
कुणाकुणाचा बनाव आहे
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
