श्री प्रमोद वामन वर्तक
कवितेचा उत्सव
नवा छंद श्री प्रमो वामन वर्तक
☆
वेड वाचनाचे मजला
होते काल परवा पर्यंत,
शेकडो पुस्तके वाचली,
अथ पासून इतिपर्यंत !
*
आजकाल वाचायचा
येतो मज फार कंटाळा,
कळत नाही वाचतांना
कधी लागतो डोळा !
*
मग ठरवले मनाशी
वाचन तर करायचे,
पण पुस्तकां ऐवजी
माणसांना वाचायचे !
*
नवीन छंद माझा मला
मनापासून आवडला,
वाचनापेक्षा आनंद
मी त्यातच अनुभवला !
*
पण झाला एक घोटाळा
घडले वेगळेच आक्रीत,
भेटता पुस्तकांतील पात्रे
झालो खरा मी चकीत !
*
जागेपणी ‘भेटलेली’ पात्रे
‘वाचली’ होती पुस्तकांत,
विश्वास ठेवा माझ्यावर
काढू नका मज वेड्यात !
काढू नका मज वेड्यात !
☆
© श्री प्रमोद वामन वर्तक
संपर्क – दोस्ती इम्पिरिया, ग्रेशिया A 702, मानपाडा, ठाणे (प.) – 400610
मो – 9892561086 ई-मेल – [email protected]
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
