श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # 277
☆ कोरडवाहू डोळे… ☆ श्री अशोक श्रीपाद भांबुरे ☆
☆
ते कोरडवाहू डोळे, मला भेटले होते
ओठांचे गुलाब मीही, त्यास पाजले होते
*
पहिल्यांदा भेटुन सुद्धा, कसा भाळला इतका
मी काही केले नव्हते, फक्त लाजले होते
*
तो वितळत गेला गोळा, ओठी विस्तव होता
बर्फाच्या गोळ्यांने हे, अधर जागले होते
*
विश्वाच्या गोंगाटाचे, ध्यान कुणाला येथे
दोघांच्या एकांताने, विश्व व्यापले होते
*
नजरेचा रोख तयाच्या, पदराला कळलेला
पदराने दोन्ही खांदे, फक्त झाकले होते
*
प्रेमाच्या आणाभाका, कधी घेतल्या नाही
मुखड्यावर घेणे मुखडे, नित्य टाळले होते
*
हे विलासमंदिर होते, कुठेच माती नव्हती
मी फरशी काढुन तेथे, रोप लावले होते
☆
© श्री अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
