श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # 279
☆ कैलास व्हावे… ☆ श्री अशोक श्रीपाद भांबुरे ☆
☆
वाटते मुद्दाम मी नापास व्हावे
मालकी मजला नको मी दास व्हावे
*
पाउले गिरिजा पतीची पूज्य मजला
त्याचसाठी वाटते कैलास व्हावे
*
रेशमी केसात गजरे माळले तू
वाटते आहे सुगंधी वास व्हावे
*
चाळलेला देह सारा हा तुझा मी
वाटते आता तुझा मी श्वास व्हावे
*
दूर तू आहेस याची जाण आहे
तू जवळ आहेस असले भास व्हावे
*
आसनावर तू बसावे छान पैकी
आसनाची मी तुझ्या आरास व्हावे
*
पाहिलेला हिंस्र प्राणी मी भुकेला
वाटते मज आज त्याचा घास व्हावे
☆
© श्री अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
