मराठी साहित्य – कवितेचा उत्सव ☆ वे ध ! ☆ श्री प्रमोद वामन वर्तक

श्री प्रमोद वामन वर्तक 

 कवितेचा उत्सव 

वे ध !   श्री प्रमोद वामन वर्तक 

बसलो निवांत पडवीत

झोके घेत झूल्यावर

बघता बघता भरून गेले

काळ्या जलदांनी अंबर

सोबतीस त्या घुमू लागता

समीराचा भयावह नाद

वाटे तरु लता उच्चरवाने

गाऊ लागती चारी ते वेद

जाई चमकून मधेच चपला

उजळून आसमंत सारा

जीव रानीचे भ्याले सारे

शोधू लागले उबेचा निवारा

रचले यज्ञकुंड निसर्गाने

भेगाळल्या धरती वरती

धुवांधार आषाढ सरी

देती त्यावर ओली आहुती

हे चक्र कालातीत निसर्गाचे

सदा असेच पुढे जायाचे

वेध लावून सासुरवाशीणींना

हसऱ्या नाचऱ्या श्रावणाचे

© श्री प्रमोद वामन वर्तक

१५-०८-२०२१

(सिंगापूर) +6594708959

मो – 9892561086

ई-मेल – [email protected]

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈