प्रा.अरूण विठ्ठल कांबळे बनपुरीकर
कवितेचा उत्सव
☆ राही ….! ☆ प्रा.अरूण विठ्ठल कांबळे बनपुरीकर ☆
किती विश्वासाने
दिलास हाती हात ,
तू विचारलीस मग
हळूच मजला जात .
का जात घेऊनी
जन्मास आलो होतो ,
ह्या जाती मधूनी
मलाच शोधत होतो .
मी सांगितली तुज
माझी मानव जात ,
तू नकळत माझा
घट्ट केलास हात .
तू शांत चंद्रमा आणि
मी धगधगणारा सूर्य ,
या नव क्रांतीसाठी
दिलेस मजला धैर्य .
हे धैर्य घेऊनी
दारी आलीस जेव्हा ,
मग मानवतेची
ज्योत तेवली तेव्हा .
मी कधीच माझी
जात चोरली नाही,
तू बिलगून मजला
बनून गेलीस राही .
© प्रा.अरुण कांबळे बनपुरीकर..
‘काळजातला बाप ‘कार
बनपुरी ता.आटपाडी जि.सांगली
मो ९४२११२५३५७
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
