सौ.ज्योत्स्ना तानवडे
कवितेचा उत्सव
☆ || अमृतभूमी || ☆ सौ.ज्योत्स्ना तानवडे ☆
भारत आमची देवभूमी
उभ्या जगात अमीट ठसा
कर्तृत्वाने सदैव जपूया
देशभक्तीचा घेतला वसा ||
इतिहासाच्या पानापानांत
शौर्य भक्तीची झुंजार वाणी
दऱ्या-खोर्यातूनी घुमतसे
स्वतंत्रतेची मंगलगाणी ||
स्वातंत्र्यास्तव किती झुंजले
रक्त सांडले प्राण अर्पिले
बली वेदीतून आकारा ये
स्वतंत्रतेचे शिल्प साजिरे ||
ज्ञान-विज्ञान संपन्नतेचा
थोर वारसा असे लाभला
शिखरे गाठून कर्तृत्वाची
देऊ झळाळी या वैभवाला ||
जन्म लाभला पवित्र देशी
भाग्य आपुले हे अविनाशी
तिच्या प्रगतीचे होऊ भोई
यश पताका नेऊ आकाशी ||
ही भारतभूच्या स्वातंत्र्याची
अमृतमहोत्सवी पर्वणी
आसेतू हिमाचल गर्जती
सुरेल मंगल यश गाणी ||
सुरेल मंगल जय गाणी ||
© सौ.ज्योत्स्ना तानवडे
वारजे, पुणे.५८
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
