मराठी साहित्य – कवितेचा उत्सव ☆ श्री अशोक भांबुरे जी यांची कविता अभिव्यक्ती # 131 ☆ वाळवंट ☆ श्री अशोक श्रीपाद भांबुरे ☆

☆ वाळवंट ☆

ह्या पाकळ्या फुलांच्या गळतात फार लवकर

पण ठेवती जपूनी अनमोल त्यात केशर

रात्रीत फूल झाले कळले कुठे कळीला

नेसून काल होती रंगीत छान परकर

शेतातलाच माझ्या कापूस शुभ्र नेला

तोट्यातलाच सौदा सुनसान जाहले घर

पाषाण हृदय माझे ठरवून लोक गेले

दगडात वाहणारा दिसला कुणा न पाझर

हे वाळवंट झाले माझ्या कधी मनाचे

उडतोय फक्त धुरळा माझ्या इथे मनावर

गावातले जुने घर कौले उडून गेली

भिंतीस तोडुनीया बाहेर येइ दादर

येऊन पूर गेला मी कोरडाच आहे

मातीत पालथी का आहे अजून घागर ?