सौ. पल्लवी ऋषिकेश कुलकर्णी
कवितेचा उत्सव
☆ आयुष्य… ☆ सौ. पल्लवी ऋषिकेश कुलकर्णी ☆
अभंग ( ६ ६ ६ ४ )
सप्तरंगी न्हावे । आनंदी नांदावे ।
सौख्याने सांधावे । आयुष्याला ।
तिळ तिळ घ्यावे । मण मण द्यावे ।
सत्पात्री करावे । दान अंतरी ।
दुःख विसरावे । सुख मिरवावे ।
मन सावरावे । आनंदाने।
सूर आनंदाचे । सुरात छेडावे ।
सूर सापडावे । आपलेसे ।
सडा शिंपडावा । माती मुरवावा ।
मनाला ओलावा । मातृत्वाचा ।
एकरूप व्हावे | कर्तव्य करावे ।
अभंग रहावे । संसारात ।
फुले आयुष्याची | फुलावी मनाने |
माळावी सुखाने | सुगंधीत ।
देवाचीये दारी । मन लीन व्हावे ।
नाम मुखी यावे । पांडुरंगा ।
© सौ. पल्लवी ऋषिकेश कुलकर्णी
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
Khupch chan kavita pallavi