मराठी साहित्य – कवितेचा उत्सव ☆ श्री अशोक भांबुरे जी यांची कविता अभिव्यक्ती #139 ☆ कुंपण माणुसकीचे ☆ श्री अशोक श्रीपाद भांबुरे ☆

☆ कुंपण माणुसकीचे ☆

माती, लाकुड, कौलाने घर शांत राखले

सिमेंट, वाळू, लोखंडाने खूप तापले

दोन फुटांच्या भिंतींचे घर जरी कालचे

वीतभराच्या भिंतीवर येऊन ठेपले

सारवलेली छान ओसरी स्वच्छ घोंगडे

खांद्यावरचा नांगर ठेवत अंग टेकले

घराभोवती होते कुंपण माणुसकीचे

काटेरी तारांचे कुंपण मात्र टोचले

पान सुपारी सोबत चालू होत्या गप्पा

पारावरती जमले होते लोक थोरले

हायजीनची उगाच पात्रे हवी कशाला

केळीच्या पानात जेवणे खूप चांगले

पाश्चात्त्यांच्या संस्कृतीचे गुलाम झालो

प्राचीन संस्कृतीचे आम्ही पंख छाटले