श्रीमती अनुराधा फाटक
कवितेचा उत्सव
☆ अधांतरी… ☆ श्रीमती अनुराधा फाटक ☆
मानस सरोवरीच्या हंसा
जा उडून कुठंतरी
मीच आहे अधांतरी
तुला कसा सांभाळू ?
मनीच्या खोपीतल्या सुगरणी
नको बांधू नवे घरटे
नैराश्याचे बोचणारे काटे
तुझ्या घरट्यात अडकतील
अन् घरट्याची नाजूक वीण
विस्कटून विस्कटून जाईल !
लावू नकोस कोकीळे
मन जागविण्या पंचम
आघात सोसून सोसून
थंड पडलयं माझं मन !
या थंडगार मनात
कसे रहातील
हंस, सुगरण, कोकीळ ?
त्यांच्या मनानं घ्यावी भरारी
मनातून माझ्या जावे अंबरी
मला माहीत आहे
मीच आहे अधांतरी !
© श्रीमती अनुराधा फाटक
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
