सौ. पल्लवी ऋषिकेश कुलकर्णी
कवितेचा उत्सव
☆ सांग सये… ☆ सौ. पल्लवी ऋषिकेश कुलकर्णी ☆
सांग सये तुज कुठे मांडावे
कवितेच्या चौकटीतुनी का
भरून आल्या आभाळातूनी
तुझ्याच ठायी दिसते मजला
क्षितीजामधली गूढ निळाई ….. १
तुझ्या मौनाची निरगाठ ही
वाटे व्हावी सैल थोड़ी
सांधलेस तू सगे सोयरे
वळ गाठीचे तुझ्याच पायी ….. २
तिलांजली दिलीस सर्वांसाठी
तुझ्यातल्या स्त्रावांना होमातूनी
तुझ्यातल्या तुला कसे ग
दिलेस कायम दूर लोटुनी …. ३
बघ जरा तू सत्वर आता
काय मागते तुझी ही काया
झुगारून दे पायातील बेड्या
बोलावती तुला वाटा या वेड्या …….. ४
खुलु देत नवे पंख मनीचे
स्वार होऊनी जा तुझ्याच देशा
होईल मनोहर स्वप्न अंतरीचे
पूर्णत्वाची प्रचीती द्याया ….. ५
© सौ. पल्लवी ऋषिकेश कुलकर्णी
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
