श्रीशैल चौगुले
कवितेचा उत्सव
☆ मित्रमूर्ती… ☆ श्रीशैल चौगुले ☆
नित्य एक मूर्ती
नयनात वसते
हृदयात असते
कुणी बरे,प्रश्न.
तोच हात माझे
दृष्टी तोच होई
वेळ काळ माझा
त्याचीयाच ठाई.
वाणी वदे सत्य
कर्म जरी तथ्य
श्रवण-मनन
देहाशी निमीत्य.
श्वास स्पंद तोची
ज्ञान चेतनात
किती सांगू गाथा
क्रिया अंतरात.
अदृश्य प्रसन्न
घडे क्रम भाव
सुख-दुःख ठाव
प्रकृती स्वभाव.
आत्म तो संवाद
साधीशी मनात
नाद गुंज मंत्र
जीवाशी ऋणात.
तो सखा सतत
सोबती जीवनी
मी सुदाम भोळा
सृष्टी वृंदावनी.
प्रेम भक्ती पोहे
आवडीने रुची
तोच घास सत्व
कृष्ण या प्रपंची.
© श्रीशैल चौगुले
९६७३०१२०९०
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
खूप छान !
सहाक्षरी / षडाक्षरी कविता