मराठी साहित्य – कवितेचा उत्सव ☆ तुझी याद यावी… ☆ श्री रवींद्र सोनावणी ☆

श्री रवींद्र सोनावणी

 कवितेचा उत्सव 

☆ तुझी याद यावी… ☆ श्री रवींद्र सोनावणी ☆ 

अशा शून्य रात्री, तुझी याद यावी

सुखाची फुले, गात्र, गात्री फुलावी ||°||

गुलाबी तरी, बोचरे थंड वारे

कळ्यांना कळे, लाजरे ते इशारे

जरा पापणी, मंदशी थरथरावी ||१||

मनाची जरी बंद, उघडून दारे

पुसावे मला, “ईश्य ! जागाच का रे ?”

शहाऱ्यांत ओली, स्मृती चाळवावी ||२||

बदलता कुशी, स्पर्श केसांस व्हावा

कुणी फुंकरीने, दिवा मालवावा

तुझी सोनकाया, मिठीबंद व्हावी ||३||

तुझे श्वास, निःश्वास, गंधीत व्हावे

आणि लाजणे, चुंबनी विरघळावे

शहाळी सुधेची, अशी रिक्त व्हावी ||४||

© श्री रवींद्र सोनावणी

निवास :  G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५

मो. क्र.८८५०४६२९९३

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈