मराठी साहित्य – कवितेचा उत्सव ☆ जगद्गुरु तुकोबाराय… ☆ श्री तुकाराम दादा पाटील ☆

श्री तुकाराम दादा पाटील

 कवितेचा उत्सव 

☆ जगद्गुरु तुकोबाराय… ☆ श्री तुकाराम दादा पाटील … ☆ 

देहू गाव माझे संतांचे माहेर

इंद्रायणी काठी तुकोबांचे घर —

 नाम संकिर्तन विठ्ठलाचे केले

 केला उपदेश  लोक उद्धरले

भक्ती मार्गासंगे जोडला संसार —

कैवल्याची खूण चित्ती समाधान

सांगे उकलून वेद, विद्या,ज्ञान

धर्म कर्मठांचे मोडले व्यवहार —

शुद्ध भक्तिमार्गी रचीयला गाथा

विठ्ठल चरणी ठेवुनीया माथा

भेदा भेद भ्रम सारियले दूर —

लोभ मोह माया मानला विटाळ

संत संगतीचा जमवुनी मेळ

टाकले वाटून ज्ञानाचे भांडार —

संत श्रेष्ठ ऐसा जगद्गुरु झाला

रंगुनी कीर्तनी अखंड नाचला

ध्यान समाधीत झाला निर्विकार —

© श्री तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈