सौ. जयश्री पाटील
कवितेच्या उत्सव
☆ भोळा भक्ती भाव… ☆ सौ. जयश्री पाटील ☆
☆
जीव माझा वेडावला
दर्शनासी आतुरला
कुठे शोधू विठुराया
ओढ लागली मनाला ll१ll
*
पहाटेच्या आरतीत
फुललेल्या रे फुलात
बाळ लीला बघण्यात
शेतातल्या रे पिकात ll २ll
*
प्रपंचाचा हा डोलारा
सांभाळता सांभाळता
कष्ट सारे निवळती
तुझ्या नामात रमता ll ३ll
*
ओढ तुला भेटण्याची
डोळे भरू पाहण्याची
चालू लागती पाऊले
वाट मग पंढरीची ll ४ll
*
ऐका आता पांडुरंगा
हाक माझ्या अंतरीची
तुज वीण व्यर्थ जन्म
फक्त आस रे भेटीची ll ५ll
*
ध्यास लागतो तुझाच
नको खेळू लपंडाव
कुठे शोधू विठुराया
भोळा माझा भक्तिभाव ll ६ll
☆
© सौ. जयश्री पाटील
विजयनगर.सांगली.
मो.नं.:-8275592044
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
