श्री आशिष बिवलकर
चित्रकाव्य
– ध्यास…– ☆ श्री आशिष बिवलकर ☆
☆
पाईपमध्ये मांडला संसार,
त्यात वाढवतेय सावित्रीची लेक !
शिक्षणाचा ध्यास तिला,
लहान डोळ्यात स्वप्न पाहते अनेक !
☆
ना स्वतः चे घर,
ना शिरावर छप्पर कुठले !
ना उजेडाला दिवा,
ना झोपायला खाटले !
☆
परिस्थितीशी झगडा,
पण शिक्षणाची तळमळ !
सरस्वतीच्या मंदिरासाठी,
मायलेकींची चाले धावपळ !
☆
नशिबाची घंटी जरी अबोल,
तरी शाळेच्या घंटेकडे लागे कान !
उशीर नाही ना होणार शाळेला,
याचे सदैव राही दोघींना भान !
☆
सर्व शिक्षणाचा अधिकार,
प्रत्येक पाल्याचा जन्मजात हक्क !
तो गाजवण्यासाठीची जिद्द पाहून,
फाटकी परिस्थिती होई थक्क !
☆
गुणवान मुलगी शिकेल सवरेल,
चांगल्या दिवसांची आईला हो आशा !
खडतर वर्तमानाच्या छातीवर पाय ठेवत,
उज्वल भविष्यासाठी ठरवलीय तिने दिशा !
☆
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
