सुश्री उषा जनार्दन ढगे
चित्रकाव्य
-वसंत बहार- ☆ सुश्री उषा जनार्दन ढगे ☆
☆
आरंभ होतो चैत्र मास
प्रवेश सूर्य मेषराशीत
चाहूल लागे वसंत ऋतूची
झाडांवर चैत्रपालवीची सुरुवात..
☆
सरता मागे ऋतू शिशीर
उष्मा जाणवे आसमंतात
फुलून येता बहावा गुलमोहोर
लाल पिवळ्या फुलांची बरसात..
☆
सृजन चाहूल चैत्रारंभाची
येतो बहरून आंब्याचा मोहोर
फुलांमधूनही ओसंडे आनंद
सण गुढीपाडव्याचा शुभदिन प्रवर..
☆
वेड लावी सुगंध दरवळ
शुभ्र धवल मोगर्याचा
कुहू कुहू कोकीळ कुंजन
आस्वाद आंब्याची डाळ पन्ह्याचा..
☆
तळपतो भास्कर आकाशी
चुणूक तेजस्वी उन्हाची
उष्ण झळाळीचे दिवस येती
सृजनशीलता चैत्र मासाची..!
☆
चित्र साभार – सुश्री उषा जनार्दन ढगे
© सुश्री उषा जनार्दन ढगे
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
