सौ. रेणुका धनंजय मार्डीकर
चित्रकाव्य
– “दरी डोंगरी वसंत फुलला…” – ☆ सौ. रेणुका धनंजय मार्डीकर☆
☆
दरी डोंगरी वसंत फुलला
पक्षांच्या रंगात
झुळझुळणारा झरा गातसे
मंजुळ गाणे त्यात
*
हिरवाईवर जणू भासती
रंगबिरंगी फुले
पारंब्यावर हिंदोळत पक्षी
उंच घेतसे झुले
*
शुभ्रधवल ते खळखळ पाणी
वनराई फुलली त्यात
नील गगनी त्या रविकर येऊन
किरणांची बरसात
*
अविरत चाले मंजुळ खळखळ
जणू कृष्णाची मुरली
निर्झरास त्या मोहित झाली
राधा वनराई मधली
*
सप्तरंग सांडले चराचरी
जलधारांचे चौघडे
पोपट रावे विहग देखणे
नयनरम्य बागडे
☆
© सौ.रेणुका धनंजय मार्डीकर
औसा.
मोबा. नं. ८८५५९१७९१८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
