मराठी साहित्य – चित्रकाव्य ☆ जायचेच जर न येण्यासाठी … ☆ सुश्री नीलांबरी शिर्के ☆

  चित्रकाव्य  

☆ जायचेच जर न येण्यासाठी… ☆ सुश्री नीलांबरी शिर्के☆

☆

पुन्हा परत ना इथे यायचे

ठरवूनच ती निघून गेली

ती येण्याची वाट परंतू

इथे वाट पहात थांबली

*

 त्या वाटेवर तिच्याचसाठी

 मऊ रेशमी हिरवाई आली

 अन् वाटेच्या अगदी मध्ये

 झाड उभे विश्रांतीसाठी

*

 येणार जर नव्हती तु तर

 वाट कशाला आखीव मागे

 पाहणारा गुंततो  आपसूक

 आठवणींचे उलगडून धागे

*

  जायचेच जर न येण्यासाठी

  काहीही  ठेवावे  ना  पाठी

  खाणाखुणा नष्ट कराव्या

  हवे ते जपती काळीजकाठी

©  सुश्री नीलांबरी शिर्के