मराठी साहित्य – मराठी कविता ☆ कवितेच्या प्रदेशात # 152 ☆ चेतना… ☆ सुश्री प्रभा सोनवणे ☆

सुश्री प्रभा सोनवणे

 कशी सांग आता करू अर्चना

करावी कशी सांग आराधना

तुझी मूर्त आहे मनीमानसी

असे प्रीत माझी खरी साधना

करू मी कशाला व्रते ,याचना

असे श्वास माझा तुझी प्रार्थना

 भवानी तुला काय मागू पुन्हा

तुला माहिती नेमक्या भावना

 असे स्वामिनी तू कुळाची सदा

  वसे नित्य देही तुझी चेतना

तुझी सेविका मी तुझी बालिका

महामाय,रक्षी अशा बंधना

उभा जन्म लाभो तुझी सावली

अखेरीस स्वीकार ही वंदना !!

© प्रभा सोनवणे

संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011