सुश्री प्रभा सोनवणे
कवितेच्या प्रदेशात # 168
☆ माझे जीवन आधार ☆ सुश्री प्रभा सोनवणे ☆
☆
आई आणखी वडील
शैशवी जीवनाधार
लाभणे प्रौढत्वातही
भाग्यच अपरंपार!
☆
वडील होते पाटील
दरारा गावात फार
आईही वाघीण माझी
शब्दा तिच्या अति धार !
☆
शुभ्र वस्त्रातील तात
आठवती वारंवार,
पुष्कराज,पाचू हाती
अंगठ्या सोन्याच्या चार
☆
आई चांदणी शुक्राची
सोन्यात साजिरी दिसे
चंदेरी डाळिंबी साडी
झंपर हिरवे असे !
☆
ऐश्वर्याचा काळ गोठे
अवचित एकाएकी
शब्दच नाही वर्णाया
नसे मुळी फुशारकी !
☆
शापित कुणी गंधर्व
आणि अस्वस्थ आत्मा ती
” हंसोका जोडा” बिछडे
काळ रडे का एकांती!
☆
असा नियतीचा डाव
जगणे झाले अंगार
सदैव होते ते दोघे
माझे जीवन आधार!
☆
© प्रभा सोनवणे
संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011
मोबाईल-९२७०७२९५०३, email- [email protected]
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
