सुश्री प्रभा सोनवणे
कवितेच्या प्रदेशात # 206
☆ एक स्फुट ☆ सुश्री प्रभा सोनवणे ☆
☆
एका मॅट्रिक्युलेट मैत्रीणीबरोबर,
गप्पांचे मस्त झुरके
घेत असताना,
मी वाचते—
व्हाॅटस अॅप वरचा,
एका एम.ए.एम.फिल.
मैत्रिणीचा मेसेज—-
“उद्या सासूबाईंचं पित्र आहे,
अमूक भाज्या निवडल्या,
आळूची वडी उकडली…
पित्र म्हणून कोणाला जेवायला
बोलवावं हा विचार करतेय,
अगं गंगा भागिरथी बायका
आठवत नाहीत,
अमूक अमूक आठवली
पण ती कितपत पाळते
असे वाटले!”
माझ्या चेह-यावरचे सखेद आश्चर्य वाचत,
मैत्रीण म्हणाली,
“कुणाचा मेसेज??”
तो कालबाह्य शब्द वापरलेल्या,
त्या उच्चशिक्षित
मैत्रीणीचा मेसेज वाचून दाखवला…
तेव्हा,
ती मॅट्रिक्युलेट मैत्रीण म्हणाली,
“कळला तुझ्या त्या मैत्रीणीचा आय. क्यू !”
मी “नारी समता मंच” मधे
जायला लागले आणि तेव्हापासून,
कधीच लावली नाही नावापुढे
सौ. ची उपाधी!
माझ्या चौथी शिकलेल्या कामवाल्याबाई–
कुसुमताई म्हणाल्या होत्या,
त्या काळात,
“वहिनी मला नाही आवडत,
ते सौ. बिव लावायला!”
विद्याताईंची चळवळ,
केव्हाच तळागाळात
पोचलेली,
पण सो काॅल्ड सुशिक्षित,
त्यापासून अजूनही अनभिज्ञ… कोसो दूर…
☆
© प्रभा सोनवणे
संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011
मोबाईल-९२७०७२९५०३, email- [email protected]
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
