सुश्री प्रभा सोनवणे
कवितेच्या प्रदेशात # 211
☆ आनंदी आनंद गडे ☆ सुश्री प्रभा सोनवणे ☆
☆
या वर्षाअखेर ठरवलं आम्ही भावंडांनी
थर्टी फर्स्टला भेटायचं,
गेली काही वर्षे,
एका वेगळ्याच मैत्रीणींच्या
ग्रुप मधे,
करायचे साजरा हा आनंदोत्सव!
तेवीस साल सरता सरता,
नात्यातले,
“अनिल- सुनील”
अचानक निघून गेले,
आणि मन धसकलं,
आपल्याहून लहान असलेले निघून गेले !
पुढील वर्षा अखेर आपण
असू ,नसू!
ए जिंदगी के मेले,
दुनिया में कम न होंगे….
अफसोस हम न होंगे
हे तर अंतिम सत्य…..
सत्तरी जवळ आली आणि,
तब्येतीच्या तक्रारी सुरू……
लागोपाठ दोघांनाही
थंडीतली दुखणी,
नवरा गावाला आणि
मी दिवसभर दुखण्यानं आडवी !
गावावरून आल्यावर
“आता माझी पाळी” म्हणत,
नवराही आडवा– अर्थात कुरबुरी किरकोळच!
पण बाईचं दुखणं गौण
आणि बाप्याचं मोठंच
असतं नेहमी !
दुखणं झटकून बाहेर पडले
सकाळी,
मैत्रीणींच्या घोळक्यात,
संध्याकाळी ,
तळ्यात मळ्यात करता करता ,
माहेरच्या गोतावळ्यात!
आपल्या आयुष्याच्या
प्रत्येक क्षणावर , लिहिलेलं
असतं जणू….
आज जगायचं….रडे..रडे…..कि
आनंदी आनंद गडे!
☆
© प्रभा सोनवणे
संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011
मोबाईल-९२७०७२९५०३, email- [email protected]
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
