सुश्री प्रभा सोनवणे
कवितेच्या प्रदेशात # 213
☆ मकर संक्रांत ☆ सुश्री प्रभा सोनवणे ☆
☆
सण आवडता संक्रांतीचा,
अनेक पदर असलेला !
आठवतो…
लहानपणीचा,
काळ्या गर्भ रेशमी ताग्याचा,
वडिलांनी मला आणलेला,
खऱ्या जरीचा– परकर पोलक्यासाठी !
आणि आईची चंद्रकळाही !
तीळगुळ वडी, आईचं हळदीकुंकू,
अत्तरदाणी गुलाबदाणी !
तिचं काचेच्या बांगड्याचं वेड !
आडव्या खोक्यातले चुडे!
अंगणातील सडा रांगोळी!
आजीचा आशीर्वाद,
“जन्म सावित्री व्हा, सोन्याचे चुडे ल्या!”
सुगडं, ओंब्या, ओवसा !
“सीतेचा ओवसा जन्मोजन्मीचा
ओवसा”म्हणत,
सासूबाईंनी दिलेला वसा !
डोईवरचा पदर,
हातभार चुडे..उंबरठ्यात पाय अडे!
पण मी “नारी समता मंच” मधे
जायला लागले,
आणि सोडून दिली,
नावापुढे सौ.ची उपाधी लावणं,
हळदीकुंकवाला केला राम राम!
आणि
समजला संक्रांतीचा खरा अर्थ,
नात्यात गोडी असेल तरच
जगणं सार्थ…नाहीतर सारंच व्यर्थ,
संक्रांत आता माझ्या लेखी,
फक्त तिळगुळाच्या देवाणघेवाणीचा !
समृद्ध जीवनानुभवाचा,
सण– कर्मकांडाच्या पलिकडचा!
☆
© प्रभा सोनवणे
संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011
मोबाईल-९२७०७२९५०३, email- [email protected]
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
