सुश्री प्रभा सोनवणे
कवितेच्या प्रदेशात # 241
☆ प्रश्न आहे… ☆ सुश्री प्रभा सोनवणे ☆
☆
का ? कशासाठी जगावे प्रश्न आहे
सोबतीला भंगलेले स्वप्न आहे
*
आज त्यांच्या भांडणाचे अर्थ कळले
त्या तिथेही चाललेला जश्न आहे
*
मी कुठे जाऊ ? स्वतःचे गाव नाही
भग्न वाडा ,झोपडीही भग्न आहे
*
तू तुझे झाकून ठेवावेस सारे
या जगाचे दान सारे नग्न आहे
*
काल ज्याला पाहिले संन्यस्त तेथे
आज कळले आज त्याचे लग्न आहे
*
पक्ष त्याचा वेगळा वाटे मलाही
चोर सारे पंथ हा संलग्न आहे
*
दार मी ठोठावताना समजले की
देवही सौख्यात त्याच्या मग्न आहे
☆
© प्रभा सोनवणे
संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011
मोबाईल-९२७०७२९५०३, email- [email protected]
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
