मराठी साहित्य – मराठी कविता – ? पिटुनिया ? – सुश्री ज्योति हसबनीस

सुश्री ज्योति हसबनीस

पिटुनिया 

 

बागेतल्या बहराचे, चित्र मनाशी रंगवले,

ईवल्या ईवल्या पिटुनियाला वाफ्यामध्ये रोवले ।

 

बघता बघता जिवांची , जवळीक की हो वाढली ,

खेळता बागडता , डहाळीत डहाळी गुंतली ।

 

गुंतल्या डहाळीचे डोहाळे, साऱ्यांनीच जपले

तृप्त सृजनाचे कौतुक सोहळे  नजरेने टिपले ।

 

रंगांचे हे बंदिस्त जग ,झाले खुले सर्वांसाठी ,

फुलपाखरांचे थवे लोटती , रंगोत्सवी या रंगण्यासाठी ।

 

विस्मित होई मन हे बघून, विविध छटा रंगांच्या ,

नकळत जोडले जाती कर अगाध लीलेस ईश्वराच्या ।

 

मनमोहक रंगीत साज ल्यालेला

देखणा कोपरा बागेतला ,

मनी रंगवलेला बहर प्रत्यक्षात उतरलेला ।

 

©  सौ. ज्योति हसबनीस