मराठी साहित्य – मराठी कविता – ☆ महापूर ☆ – डॉ. रवींद्र वेदपाठक

 

संथ संत कृष्णामाई

झाली भलती अधीर

आली पाहुणा घेवून

नाव त्याचे महापूर……..!! १ !!

 

व्याकुळला ओला जीव

जणू गायीचा हंबर

सांज बुडता बुडता

कासावीस ते अंबर……..!! २ !!

 

दंश भिनला देहात

रानी पेटले काहूर

वाहणाऱ्या वेदनेची

हुळहुळे हूरहूर………!! ३ !!

 

मनस्विनी कृष्णामाई

छेडी दुःखाची लहर

संधिकाळी आक्रोशतो

ऊरी जीवांचा कहर……..!! ४ !!

 

मानवाच्या काळजात

जागविले देवघर

मनोमनी पालविले

चैतन्याचे औदुंबर………!! ५ !!

 

तळेगाव.