श्री विक्रम मालन आप्पासो शिंदे
(आज प्रस्तुत है श्री विक्रम मालन आप्पासो शिंदे जी की नारी सशक्तिकरण एवं नारी शिक्षा के क्षेत्र में क्रान्ति की ज्योति जगाने वाली स्व सावित्रीबाई फुले जी की 3 जनवरी को उनकी 189 वी जयंती पर उन्हें सादर नमन करते हुए यह एक भावप्रवण कविता “☆ क्रांती….!!! ”।)
☆ क्रांती….!!! ☆
(सावित्रीमाई फुलेंच्या 189 व्या जयंती निमित्त शिक्षणाच्या क्रांतिज्योतींना विनम्र अभिवादन…. )
हे सावित्रीच्या सावित्री
माझी झलकारी,काशी,आनंदीबाई
आम्ही किती केला गाजावाजा
तुझ्या त्या समर्पणाचा….
विद्रोहाने पेटून उठाणाऱ्या
तुझ्या त्याच स्त्रीवादाचा…!
याचं स्त्रीवादाच्या नावाखाली
तुझचं शस्त्र आणि सांत्वन करून
तुलाच पुन्हा नव्याने आज
बेड्या घातल्यात
…त्या मानसिक गुलामीच्या..!!
लग्न,संसार,प्रेम आणि
एकनिष्ठतेच्या रांडाव मर्माखाली
तूचं तुला खरं तर
घेराव घातलायसं,
….सत्ताकतेच्या उंबऱ्याआड़..!!!
शिक्षणाच्या शस्त्रामुळं
तू आता मात्र
झगड़ा करतीयेस
सर्व काही झुगारून
…बेमुदत मुक्त जगण्यासाठी..!!
“अगं ,
तू-
ओरड़तेस..
रडतेस..
झगड़तेस..
लढतेस..नव्हे नव्हे तर
फटकारतेस सुद्धा…
कारण,
तुला तुझं “माणुसपणं” हवं आहे..!!”
पण माफ कर आम्हाला
आम्ही याचचं बाजारीकरण केल गं
आणि तुझं बाईपणं माननं
अजुन सोडलचं नाही..!!
आता मात्र पुन्हा
तुलाच लढावं लागेल
साऊ बरोबर ज्योतीही व्हावं लागेल
तुझच बाईपणं तुलाच सोडाव लागेल
तेव्हाच स्त्रीवादाची क्रांती होईल…
-ती फ़क्त माणुसपणासाठी…!!!
© कवी विक्रम मालन आप्पासो शिंदे
मु/पो-वेळू (पाणी फाउंडेशन), तालुका-कोरेगाव, जिल्हा-सातारा 415511
मोबाइल-7743884307 ईमेल – [email protected]
