सुश्री शोभा जोशी
वाचताना वेचलेले
☆ “सरणारे वर्ष मी…” – कवी : मंगेश पाडगावकर ☆ प्रस्तुती – सुश्री शोभा जोशी ☆
(…मंगेश पाडगावकरांची वर्षाच्या निरोपाची सुंदर कविता)
*
मी उद्या असणार नाही
असेल कोणी दुसरे
मित्रहो सदैव राहो
चेहरे तुमचे हसरे ।।
*
झाले असेल चांगले
किंवा काही वाईटही
मी माझे काम केले
नेहमीच असतो राईट मी ।।
*
माना अथवा मानू नका
तुमची माझी नाळ आहे
भले होवो, बुरे होवो
मी फक्त ‘ काळ ‘ आहे ।।
*
उपकारही नका मानू
आणि दोषही देऊ नका
निरोप माझा घेताना
गेटपर्यंंतही येऊ नका ।।
*
उगवत्याला “नमस्कार”
हीच रीत येथली
विसरू नका ‘एक वर्ष’
साथ होती आपली ।।
*
धुंद असेल जग उद्या
नववर्षाच्या स्वागताला
तुम्ही मला खुषाल विसरा
दोष माझा प्राक्तनाला ।।
*
शिव्या, शाप, लोभ, माया
यातले नको काही
मी माझे काम केले
बाकी दुसरे काही नाही ।।
*
निघताना “पुन्हा भेटू”
असे मी म्हणणार नाही
‘वचन’ हे कसे देऊ
जे मी पाळणार नाही ।।
*
मी कोण? सांगतो
“शुभ आशीष”देऊ द्या
“सरणारे वर्ष ” मी
आता मला जाऊ द्या ।।
प्रस्तुती : शोभा जोशी
© सुश्री शोभा जोशी
मो ९४२२३१९९६२
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
