मराठी साहित्य – वाचताना वेचलेले ☆ “हंडी…” – कवयित्री : सुश्री अश्विनी परांजपे रानडे ☆ प्रस्तुती – श्री सुनीत मुळे ☆

📚 वाचताना वेचलेले 📖

☆ “हंडी…” – कवयित्री : सुश्री अश्विनी परांजपे रानडे ☆ प्रस्तुती – श्री सुनीत मुळे ☆

☆

हंडी बांधली षडरिपूंची

रचले सहा पदरी थर 

सहज पार करू म्हणत

चढू लागले वरवर 

*

मोह होता दही लोण्याचा 

प्रत्येकाची नजर वर 

एकमेकांच्या आधाराने 

मार्ग होई अधिक सुकर 

*

जो पोहोचे हंडीपाशी 

वाटे त्याचा मनी मत्सर 

आधाराची कडी सुटता

निसटत जाई प्रत्येक थर 

*

काम क्रोध येता आड 

एकजुटीवर होई वार 

लोभ सुटेना लोण्याचा 

कृष्ण एकच तारणहार 

*

करांगुली सावरे उतरंड 

पुन्हा एकदा रचे डाव 

कर्माचा सिद्धांत सांगे 

फळाची नकोच हाव 

*

हंडी बांधली संकल्पाची 

कर्मयोग स्मरुनी मनात

सत्कर्मांची रास रचता

समाधान ओसंडे उरात ……. 

☆

कवयित्री :  सुश्री अश्विनी परांजपे – रानडे

प्रस्तुती : श्री सुनीत मुळे 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈